Op vastelaoveszondig in 1975, in de aaj donderie (wo noe de kienjerboerderie sjteit), waas Frans Meisters oetgeroope as Frans I van de put Don ’67 en toen waerde ut idee gebaore det ut toch waal heel sjoon zol zeen es d’r op de Donderberg ouch ein carnavals vereniging zol zeen.
De 6 oprichters kwame biejein en in korte tied haaje ziej 11 raods leje en eine Vors. De naam van de vereniging is door miense oet de wiek aangedrage en V.V. de Donderböl waas gebaore!
En op de 11 van 11 in 1975 kwame ziej in ein euvervolle nuuj Donderie binne mit eine raod van Ellef en eine Vors, genaamp Vors Karel(†).
De Donderböl trokke mit häör Prinse door gans Remunj maar veural op de Donderberg lete ziej zich good zeen, op de sjoole, biej de seniore en in de kienjeroptoch op de Donderberg, dae altied plaats vonj op vastelaoveszunjig. D’r ware heel veul activiteite in de Donderie en noa 11 jaor mochte ze toetraeje toet ut SRV, sindsdien kinse neet meer om de Donderböl haer.
In de begin jaore (in de aaj Donderie), krege de Donderböl ouch ein eige mascotte te weite “Donderpeerke” dae volges traditie nog altied in de Donderie waert gehange en op vastelaovesdinsdaag weer in zien kies verdwient veur ein gans jaor ! De pop Donderpeerke waerde gemaak door Chris Bosma(†). Ut leedje “os Donderpeerke” gemaak door Joke Linnartz, waerd taegeweurdig nog sjteeds gezonge door jong en oud.
De waage waerde in de begin jaore geboewd biej ut fruithuis van Sef Geraeds wo noe de Sjterreberg ligk. Taegeweurdig waere die gehuurd, maar toen moste ze nog alles zelf make van pepier mache!
Menige aovend waas de Donderie te klein, mit döks 1200 miense ‘s aoves zodet de pliese kwame det as ter 3 droet ginge, der weer 3 binne mochte laote , zo drök waas ut.
Ut is good te weete det de V.V. de Donderböl al meer dan 44 jaor besteit en neet meer weg te dinke is op de Donderberg! En alle tradities in ere gehaaje waere!
Gesrjeeve door miense van ’t eerste oer:
Nico Bleijswijk (Ere Raodslid) en Karel Linnartz (Ere Vors †)